يستحق كبير حكومة بلدنا، جايزة الأوسكار ف الصراحة السلطوية.. عودنا جنابه يُحطنا قدام القطر، قائلا: "أدي القطر أهو.. وأدي سرعته أهى.. عاجباكو الموتة قدامه، موتوا وخلصونا .. البلد فيها هم ع القلب".. صريح جنابه.. وأضح دولته.. يجنن سعادته، مبدأه: "خليك دوغري زي السكينة ف الحلاوة"، شعاره: الصراحة راحة يا شعب وإحنا ما بنكدبش".. تصريحاته بعد تسرب أنباء عن تعديل وزاري، حقن ف العضل.. ما بنخافش.. نقعد نمشي عملنا اللي علينا والباقي على الله.. أنا مش مصلحجي ولن أكون.. لا مصالح مع زيد ولا تربيطات مع عبيد".. عملية الإصلاح الفترة اللي جاية مهمة صعبة والقُفة أم ودنين يشولها اتنين.. نوه بروبلم يا كبير نشيل ونعتق برضة دي قُفة بلدنا.. محذرا من جماعات المصالح والمحسوبية بقوله: "لدينا جماعات مصالح حبه شمال وحبة يمين وحبه واقفين ع الدائري وشوية تحته مستنيين الغلط للدولة، وبين ده وده حزب المحاسين، صارخا: إحنا فين ف غابة ولا جبالية.. جنابك لأ، إحنا ف السيرك، وكله بيرقص علي سلم المصالح، حبه مع نفسهم، وحبه مع الإخوان ، وحبه مع شيطاين بره ، وحبه واقفة ف النص بتمصمص شفايفها ف انتظار الفرصة.
