المواطن الغلبان حسن حصاوي يغشى عليه من حين لآخر. وعندما يفيق لا يفهم ما حدث حوله من تغيرات، ولكن أحيانًا ما يجعل من يسمعه هو الذي يغشى عليه.
( حصاوي جالس بالمقهى يمر به الشيخ عتريس الكفيف)
عتريس
سلامو عليكم. إزيك يا حصاوي، بتعمل إيه؟
حصاوي
أديني قاعد مرمي عَ القهوة لحد ما أعرف آخرتها.
عتريس
آخرة إيه؟
حصاوي
آخرة اللي هيحصل في البلد. هتحصل حرب ولا لأ.
عتريس
لا حول الله يا رب. مين قالك الكلام دا بس؟
حصاوي
الناس والإذاعة والتليفزيون والجرايد كلهم بيقولوا هتحصل حرب أهلية.
عتريس
حرام عليك ما تصدقش الكلام دا. قوم وخد إيدي ووقَّف لنا توك توك وأنا أشرح لك.
حصاوي
حاضر. أهو . أُقف يا أسطى.
السائق
على فين بإذن لله؟
عتريس
رايحين رابعة.
السائق
أجدع ناس.
حصاوي
رابعة مين؟
عتريس
أستغفر الله العظيم.. ما تعرفش رابعة العدوية؟
حصاوي
اللي فيها الاعتصام؟ لا يا عم، روح أنت لوحدك. نزلني هنا.
عتريس
خايف من إيه يا أستاذ؟ إنت بتصدق أن الحكومة هتضرب اللي هناك؟
حصاوي
طبعًا بعد العيد طوَّالي.
السائق
حلوة دي، وهو بعد العيد يتفتل كحك؟.. هيء هيء هيء
عتريس
قوله والنبي، ثم ما هما بقالهم أسابيع وأيام بيقولوا هيضربوا ويفضوا الاعتصام وما حصلش حاجة.
حصاوي
ما هما كانوا بيدوا المعتصمين فرصة يرجعوا في كلامهم ويقصروا الشر.
عتريس
دا كلام يا عبد السلام. الحكومة بتضيع وقت عشان ما تخشش في مشاكل.
وكبارهم نفسهم بيقولوا مستعدين نصالح، وكل يوم والتاني بيقابلوا خواجات من بره وعايزينهم يتوسطوا عشان يفضوها.
حصاوي
يعني المعتصمين في رابعة ولا غيرها مش خايفين وعايزين يقصروا الشر؟
عتريس
ويقصروا الشر ليه؟ إنت عارف الجدع أو المرة من دول بياخدوا كام على كل يوم يقضوه هناك؟ مش أقل من ميتين.. تلتميت جنيه. دا غير العيال كمان لهم سعر.
حصاوي
معقولة؟ دي تبقي شغلانة بتكسب.
عتريس
أُمَّال، ربك بيرزق. أُمَّال الشحاتين والبلطجية والبياعين السريحية يعيشوا إزاي؟
حصاوي
والفلوس الكتيرة دي مين اللي بيدفعها؟
عتريس
الخير كتير، بس العقول هي اللي ضلمة، بقى شوف يا سيدي الأمريكان بيدفعوا بالدولار، ولو إن الحرامية اللي بيقبضوا منهم بيدفعوا لنا بالجنيه. والجهاديين بيدفعوا وبتوع القاعدة بيدفعوا دا غير تركيا وقطر.
حصاوي
مين قطر؟
عتريس
ما تعرفش قطر؟
حصاوي
مش واخد بالي.
عتريس
ولا أنا. لكن دي بلد طلعت من أيام ما عملوا قناة الجزيرة.
حصاوي
أه اللي بتذيع ماتشات الكورة بتاعتنا مشفرة وإحنا ما بنشوفهاش.
عتريس
عليك نور. أدينا وصلنا.
حصاوي
فيه دورة ميه هنا؟
عتريس
كل حاجة موجودة، دورة ميه. حمامات بدش. محلات بتبيع كافة شيء، حفلات سمر وحفلات زفاف.
حصاوى
هما الناس بقالهم كتير قوي هنا عشان يتعرفوا ويخطبوا ويتجوزوا كمان؟
عتريس
تعارف مين يا با وخطبة إيه؟ الموضوع يلزمه دكر ونتاية، وعشان يتم النكاح، وواحد يقولوا وراه زوجتك نفسي والناس تبقى شاهدة.
حصاوي
ويسكنوا فين؟
عتريس
في أي خيمة قيمة ساعة ويسبوها لغيرها. الإخوان كتر خيرهم حلوا للناس كل المشاكل. ولاَّ قولي الشبان والنسوان اللي ما اتجوزوش يعملوا إيه؟ يرتكبوا الحرام؟
حصاوي
بس اللي بتقوله دا يبقى جواز شرعي؟
عتريس
طبعًا شرعي. هما زمان كانوا بيتجوزوا في شقق ولا فنادق؟ ما هي يا دوب خيمة. أمال أنا جايبك هنا ليه؟ مش عشان تنقي لي عروسة على ذوقك؟.
حصاوي
أنت لسه هتتجوز يا عم الشيخ؟ دا أنت أتجوزت أربعة وعندك سبع عيال.
عتريس
حلالي. وأنا مش عايز أتخم زي المرة اللي فاتت. أستعموني وإدوني وليه خمسة وعشرين سنة.
حصاوي
وأنت تطول؟ ما أنت فت الستين.
عتريس
لأ، أنا عايز واحدة تسع سنين حسب الشرع.
( حصاوى يغشى عليه)
