فيديو.. حسن شاكوش: لم أقصد الإساءة لأحد.. وماتزعلوش مني

ظهر المطرب الشعبي حسن شاكوش خلال مقطع فيديو عبر صفحته الرسمية على إنستجرام، للتعليق والتوضيح على التصريحات الأخيرة الخاصة بأغنيته بنت الجيران، وأغنية “حاجة مستخبية” لمحمد حماقي.

وقال شاكوش: "أنا كنت بوضح للإعلامي عمرو أديب الرؤية، إن أغنية حاجة مستخبية للأستاذ حماقي، اللي أنا عرفته، إن بعض الأشخاص قالوا إن هي لحن تركي، قعدنا فترة في الكلام دا".

وأضاف: "مش قصدي أغلط في حق حد، لإنى محبش أغلط في حد الحمد لله، كل الناس عارفة إني عمري ما بغلط في حد، ولا جبت سيرة حد في شغلي وفي حياتي، أنا مليش دعوة بأي حد في المجال، ولا في الشغل، وكلهم أصدقائي، وربنا يكرم الناس ويرزق كل الناس، هي دي وجهة النظر اللي بعرفها للأستاذ عمرو، إن أغنية بنت الجيران بتاعتي، وأغنية حاجة مستخبية بتاعة الأستاذ حماقي، واللي ملحنهاله أخويا وحبيبي الأستاذ مدين، وطبعا مدين متكلمين معاه مع بعض كتير، وهو من الملحنين الشاطرين جدا، ومدين أخ ليا على المستوى الشخصي، وأنا بحبه، وهي دي النقطة اللي أنا طالع أتكلم فيها".

وأنهى حديثه: "تحية لكل فريق عمل حاجة مستخبية، وأنا مبحبش حد يزعل مني، ومدين أخويا وحبيبي، ولو في أي سوء تفاهم حصل أنا بقولكم متزعلوش".

يشار إلى أن المطرب حسن شاكوش خلال ظهوره  برنامج "الحكاية"، رد على اتهامه بسرقة لحن أغنية "حاجة مستخبية" للفنان محمد حماقي، واستخدامه في مهرجان "بنت الجيران"، قائلا: "حماقي عامل أغنية اسمها (حاجة مستخبية)، كان بقالها 5 سنين على يوتيوب عاملة 16 مليون".

وأضاف: "قالوا إحنا سارقين لحن (حاجة مستخبية)، وحصلت مفاوضات خاصة بأرباح موقع يوتيوب بين شركتي وشركة النجم محمد حماقي، واتفقنا تتقسم أي أرباح على 3 شركات.. اللي عرفته إن (حاجة مستخبية) اللحن أصلا مسروق من لحن تركي".