كلب الشارع حارس لا يغفل.. تجربة مذهلة لأهالي الدقي للتعايش مع كلاب الشارع.. تطعيم جميع الكلاب والمنطقة آمنة وخالية من "السعار"
في تجربة حضارية إنسانية مذهلة لأهالي حي الدقي، وبالتنسيق مع المجتمع المدني بمحافظة الجيزة، وتحديدا بالمنطقة المحيطة بنادي الصيد، حيث قام الأهالي بالتطوع لتطعيم جميع الكلاب الضالة بالشوارع الرئيسية والداخلية، معلنين عبر منشورات ملصقة بالمنطقة عن إنجازهم بأن المنطقة أصبحت آمنة وخالية من مرض السعار.
فيما كشف المنشور الملصق بأحد الشوارع بالدقي والتي رصدته كاميرا البوابة نيوز الآتي:
طبيعة وسلوك كلب الشارع.. نفهم علشان منتضايقش.. اسباب سلوك كلب الشارع
ليه الكلب بيهوهو وبيهجم؟
طريقة التعبير اللي ربنا خلقه بيها زي صوتنا لما بنتكلم ينبهنا لأي حوادث (سرقة، خطف، اغتصاب) شامم ريحة غريبة أو صوت عالي بيشكل خطر وبيخوفه بيحمينا من شخص غريب موجود ممكن يأذي خناقة أو فعل عنيف بين أشخاص أو كلبة والدة وبتحمي ولادها.
ليه الكلب بيجري وراء العربيات والموتوسيكلات؟
عشان بيخاف من حركة العجلة بسرعة شديدة على نفسه وعلى عياله وعلى سكان المنطقة لأنه شاف حوادث كتير في الشارع بسبب السرعة أو مات له جرو صغير بسبب حادث.
ليه الكلب بيقعد فوق العربيات؟
عشان يرطب جسمه في الحر من برودة تكييف العربية وللمراقبة أحيانا من مكان مرتفع علشان يحمينا من اي خطر أو حاجة غريبة ممكن تحصل بيحمي نفسه من غدر اي شخص ممكن يأذيه أو كلب غريب عن المنطقة.
لو الكلب هوهو أو هجم عليك امشي وسيبه أو هشه بكلمة امشي، هااااا، وبعدين وحاول تتجاهله ومتبينش انك خايف هيخاف ويسكت.
الكلب طلع فوق عربيتي رش خل أو اي ريحة نفاذة على العجل مش هيقرب منها تاني.
كلب الشارع حارس لا يغفل بدون مقابل الكلب بيخاف علينا ومننا متخافش من الكلب أبدًا.
التعامل السليم مع كلب الشارع
منربطش الكلب من رقبته أو نشده من ودانه أو ديله.
متجريش من الكلب أو وراه.
متخضش كلب نايم وتصحيه فجأة خصوصا وانت داخل بين العربيات خليك ذكي وبص بهدوء الأول.
متخوفش الكلب باي حاجة أو تحدفه بالطوب أو تشوطه برجلك أو تركب عليه نمشي في حالنا من غير من نتعرضله أو نستفزه بصوت أو حركة أو النظير في عين الكلب أو الصراخ.
متقربش من الكلب وهوه بياكل أو يلعب أو بيتجوز أو كلبة ام بترضع ولادها.
عضة الكلب دفاع عن النفس ود فعل لانه خايف من تصرف يأذيه زي ما احنا بندافع عن نفسنا بايدينا لو اتعرضنا للخطر.