والدة الشهيد إسلام مشهور تدخل في نوبة بكاء تعليقًا على حلقة الواحات
علقت سوزان عبد المجيد والدة شهيد الواحات إسلام مشهور على مشاهد مسلسل الاختيار2 في حلقتي 25 و26 قائلة: " أنا حسيت أن راسي مرفوعة وحسيت بفخر وعزة وأن إبني عاش رجل ومات بطل وأنه مكنش في الوقت ده بيفكر في نفسه كان بيفكر في بلده كان كل تفكيره إزاي يحمي بلده وإزاي يضحي بنفسه عشانها.
ودخلت والدة الشهيد في نوبة بكاء على الهواء في مداخلة هاتفية خلال برنامج " كلمة أخيرة " على شاشة " إكسترا نيوز " خلال شهر رمضان قائلة:إبني إتصاب وماقلش " أي " وكان عاوز ينزل يكمل ودي كانت الحقيقة الحمد لله طلب الشهادة وكانت أمنيته أن ربنا يكبتهاله وربنا حققها له وهو قلي بنفسه كده وقلي ياماما نفسي أموت شهيد".
وواصلت: " لما كان بيقلي كده كنت أققله ليه يانبي توجع قلبي كان يرد ويقول: ليه ياماما هو حد يطول يموت شهيد وكتب ده على صفحته على فيس بوك قبيل إستشهاده ".
وأكملت: " مشاعر شبابنا كانت بتطلع من القلب ومكنوش بيخافوا وكان رجل وكلهم كانوا رجالة وحبهم لوطنهم حاجه كبيرة "
وحول مشاهدتها للحلقة قالت: أنا وبباه كنا بنتفرج على الحلقة وحسينا وقت عرض الحلقة كأن الحادثة لسه حاصلة دلوقتي قدامي وتجسيد الشخصية كان صعب ولما شفت إبني قدامي إنهرت بالبكاء وقت الاذاعة لكن رغم ذلك رفعت راسي وقلت الحمد لله إبني عاش رجل ومات بطل"
وأتمت: إلى مأثر فينا الفراق لكن إحنا فخورين بيه وبشجاعته وتربيته لانه إتربى على التضحية والحب والاخلاص ابوه وأخوه غرزوا فيه الحتة دي وكان نفسه يعمل حاجه لبلده وكانت حاجة مشرفه ليه ولينا رفع راسنا كلنا أبوه لما شاف الحلقة تأثر بسبب الفراق "
ووجهت الشكر على القائمين لمخرج الاختيار قائلة: بشكرهم لانهم أبرزوا كافة التفاصيل ومايحدث بدقة وكأن المشاهد مش تمثيل لكنه حقيقي".