عطوة: تعرضت للإصابة في بداية مشواري مع بيراميدز بسبب الجهاز الطبي
أكد محمد عطوة مدافع نادي الاتحاد السكنردي إنه تعرض للإصابة في بداية مشواره مع ناديه السابق بيراميدز بسبب الجهاز الطبي.
وقال عطوة في تصريحات لبرنامج الماتش الذي يقدمه الإعلامي هاني حتحوت عبر شاشة صدى البلد " أول ماتش في الدوري قصاد إنبي كنت احتياطي وبعدها جالي اصابة، الجهاز الطبي إلى مش عاوز اقول أنه مش كويس كان هو سبب إصابتي".
وأضاف "اشتكيت من آلام والجهاز الطبي قالي عادي انزل اتمرن ولما نزلت اتصابت، اتعالجت وبعدين نزلوني بدري ف اتصابت تاني".
وتابع "واجهت تجاهل غريب، في شهر يناير بدأت أتأهل برة النادي واستأذنت النادي أني أخرج أتأهل برة، بعد ما خلصت التأهيل برة، جه حد في منصب مستشار فني للنادي وبعدها مسك مدير فني بشكل مؤقت، لقيته طلب مني فيديوهات علشان يشوف مستوايا ودي حاجة غريبة جدًا، بعدها المسئول إلى جابني بيراميدز كلمني وأنا مصاب بعد فترة طويلة من التجاهل ومحدش كان بيكلمني ولا بينزل خبر إن في إصابة، وكلمني يتطمن علشان يعرف آخر تطوراتي بسبب وجود عرض لعبد الله بكري من السعودية، الجهاز الفني كان بيقول استبعادي لأسباب فنية وأنا مصاب أصلًا".
وواصل عطوة "تجاهلوني أثناء إصابتي، في الوقت إللى في لاعب تاني جاله إصابة في الخلفية النادي قرر يسفره الإمارات يتعالج وأنا اتعرضت للإصابة مرتين محدش سأل فيا".
واختتم مدافع الرائد السعودي السابق تصريحاته "المركز الإعلامي مكنش بينزلي صور مع الفرقة، واتكلمت مع المسؤولين وبعدها بدأوا ينزلوا ليا صور مع اللعيبة عادي، مش عارف إيه السبب لكل ده".