صباح خضير مفجرة فضائح أحمد بسام زكي: التحرش تحول إلى جزء من ثقافة الشباب
قالت صباح خضير مفجرة فضائح أحمد بسام زكي: "أنا اتولدت في أمريكا بعدين جيت مصر وأنا صغيرة ١١ سنة مثلا وقعدت في مصر لحد ما بقي عندي ٢٧ سنة بعدين رجعت أمريكا تاني بس العربي بتاعي ضعيف عشان لما جيت مصر كان عندي ١١ سنة ومكنتش اعرف أي كلمات عربية واخدت وقت طويل عشان اتعلم عربي لانه لغة صعبة".
أضافت في تصريحات خاصة للبوابة نيوز: "درست الكتابة في جامعة في أمريكا ودرست علم نفس بجانب الكتابة عشان كان لازم اقرأ كتب علم نفس جانب دراستي للكتابة عشان اعرف اعبر عن اللي عايزه اكتبه وأقوله وارائي وافكاري وكمان عشان تفكيري يكون عقلاني مش كله مشاعر فقط".
وعن سبب تكريس صفحتها ووقتها للبحث وفضح أحمد بسام زكي وتجمعيها كل قصص الفتيات دول، قالت: "الناس بدأت تبقي واثقة فيا لانهم كانوا بيتابعوا الصفحة بتاعتي على فيسبوك من اول ما بدأت اكتب عشان كنت بتكلم عن التحرش كتير جدا وعلى أي فعل بيحصل ضد المرأة بشكل عام في مصر والناس في البداية كانت بتعملي متابعة عشان شايفين ان في حد مركز معاهم في الحاجات دي وكنت بتكلم على الصحة العقلية بتاعتنا وو ازاي نبص على المتحرش من نظرة علم النفس ونشوفه من النظرة النفسية وحتى مع أحمد بسام زكي انا متعاطفة معاه انا شايفاه غلط تماما ١٠٠٪ عشان الناس اللي بره ميتأذوش منه بس انا شايفة ان حاجات كتير وصلته لده وشايفة ان حياته وهو بيكبر اكيد كان في اكتر من حاجة خليته يبطل يحس ان اللي هو بيعمله غلط بس انا مش هصنفه انه مريض ومش عايزة احط اللوم على المرض لان في مرضي كتير مبيعملوش كده انا بحاول افهمه كبني ادم مهما كان بيعمل وعمري ما هقول اللي عمله غلط بدليل اني اتكلمت عنه وقولت لازم يتسجن ولحد دلوقتي بقول أحمد بسام زكي لازم يتسجن بس ده مش معناه اني بكرهه أو اني عايزاه يتعدم أو عايزاه يموت انا مبكنش ليه أي حاجة من الاحاسيس دي انا عايزة ان القانون المصري يحمي كل بنت وكل بني ادم علشان في الأول وفي الاخر هو بني ادم واحد بس، بس هو بيأذي ناس اكتر منه، ناس ملهاش أي ذنب في المشكلات بتاعته دي".