مصري مقيم في الصين: سوق الأسماك سبب انتشار فيروس كورونا
تسبب فيروس كورونا المنتشر حاليا في الصين، في حالة من الرعب للعالم أجمع، بعدما أعلنت الصين عن مدى خطورة هذا الفيروس وأنه يمثل وباء وينتقل عن طريق العدوى وأعراضه تشبه أعراض البرد العادي، مما دعا منظمة الصحة العالمية للتحذير من هذا الفيروس، وأنه يهدد حياة الملايين من البشر، وقد انتقل إلى دول أخرى مثل ماليزيا وفرنسا.
وكشف محمد اسامة، مقدم برامج مقيم في الصين، وفقا لما ذكره عبر صفحته الشخصية على موقع التواصل الاجتماعي "فيسبوك"، تفاصيل خطيرة حول المرض وأسباب انتشاره في الصين.
وقال إن بدايات انتشار المرض في مدينة ووهان الصينية، وعند ظهور أولى الحالات، فقد تكتمت الحكومة الصينية على هذا الأمر، وقامت بإجراءات وقائية، وأغلقت سوق الأسماك، الذي يعتقد أنه السبب في انتشار الفيروس، خاصة أنه يذبح به كافة أنواع الحيوانات المختلفة مثل (الخفافيش والثعابين والدببة والتماسيح والراكون)، حسبما ذكر المواطن المصري المقيم في بكين في مشنوره.
وأكد، أن الدولة الصينية أغلقت المدينة بالكامل والتي يبلغ تعدادها 11 مليون شخص، وأغلقت كافة السينمات والمطاعم خاصة مع اقتراب عيد هام في الصين، بالإضافة إلى أرتفاع أسعار الكمامات هناك وأنها وصلت لأسعار "تجارة المخدرات"، وفقا لما ذكر في المنشور.
وكتب "أسامة"، في المنشور الذي لاقى رواجًا كبيرًا على "فيسبوك" قائلا: "بجد الموضوع خطير واحنا عايشين على أعصابنا وكل الكلام اللي في البوست عن تجربة شخصية":
*من نحو شهر سمعنا عن مرض غامض في مدينة ووهان وسط تعتيم إعلامي كبير وناس محجوزة في المستشفى عندهم حمى وكحة شديدة مش عارفين من ايه.
*ظهرت بعد كده اخبار ان المرض انتشر من سوق للأسماك في مدينة ووهان والسلطات الصينية قفلت السوق وعقمته وسط تعتيم إعلامي كبير.
*من شهر ولحد الأسبوع اللي فات كل شوية كانت بتيجي اخبار متسربة ان في حالات جديدة وقلق ان المرض يكون بينتشر بالعدوى البشرية وبرده تعتيم إعلامي كبير.
*من الأسبوع اللي فات تم تشخيص المرض أنه سلسلة جديدة من فيروس كورونا الذي بدأ يخرج عن السيطرة والحالات بدأ عددها يزيد ولكن كل اللي سمعنا عنه كان لسه في مدينة ووهان.
*المرض غالبًا انتشر عشان سوق السمك كان بيتباع فيه حيوانات برية لغرض الذبح والأكل زي الخفافيش والثعابين والدببة والتماسيح والراكون وغيرها وده كان نفس السبب اللي بيخلي الصين دائما منبع الأمراض الجديدة والغريبة أنهم بياكلوا كل حاجة.
*خلال الأسبوع اللي فات ظهرت حالات جديدة في مدن تانية زي العاصمة الصينية بكين ومقاطعات قواندونغ وغيرها.
*الموضوع بدأ يأخذ منعطف خطير بعد ما المرض بدأ ينتشر حتى بره الصين وتم اكتشاف حالات في اليابان وتايلاند وأمريكا وأستراليا وغيرها تم نقلها عبر مسافرين صينيين ومنظمة الصحة العالمية أصدرت بيانا تحذر فيه من الفيروس.
*حاجة خطيرة في الفيروس ده أنه لا يمكن اكتشافه مباشرة، بياخد فترة حضانة من٧ إلى ١٤ يوما عشان أعراضه تبان، يعني ممكن حد يصاب من غير ما يكون عارف ولا هو ولا اللي نحوه.
*عدد الإصابات كبير تجاوز 1337 ده المعلن عنه وأكيد أكبر من كده، والوفيات المعلن عنها 41.
*الصين النهاردة قفلت المطارات والطرق السريعة ومحطات القطارات من وإلى مدينة ووهان اللي انتشر منها المرض و١١ مليون شخص هناك محبوسين في المدينة.
*السينمات اتقفلت في كل الصين وأفلام العيد كلها تأجلت.
*دلوقتي كل الناس بتخرج الشارع بالكمامات وحالة قلق شديدة لدرجة أن زمايلي في الشغل الغوا حجوزات السفر ومش هيسافروا بلدهم يعيدوا مع أهلهم في أهم عيد في الصين.
*الكمامات بتتباع بأسعار خيالية زي المخدرات والحمد لله المؤسسة اللي شغال فيها وزعت علينا كمامات ومطهر لليدين.
*عندي تصوير اتلغى عشان كان فيه تجمعات وجمهور. ومعدين البرامج دلوقتي بيسألوني إذا كنت رحت ووهان ولا لاء قبل اَي تصوير.
*انهاردة عدى علينا ناس في البيت بكمامات ودفاتر بيسألوني انا ومراتي إذا كنا روحنا ووهان الفترة دي.
*في خوف شديد وقلق من الفيروس انه يتقلب وباء بسبب فكرة أنه يتنقل بين البشر خاصة انه جاي في فترة عيد الربيع واللي بيحصل فيها أكبر هجرة بشرية في العالم أما الصينيين بيروحوا بلدهم يزوروا اهلهم.
*ياريت سلطات الحجر الصحي في المطارات المصرية تأخذ بالها من المسافرين اللي جايين من الصين.
*ياريت زمايلنا المرشدين السياحيين يخلوا بالهم من الزباين اللي نازلين معاهم لو حد سخن أو بيكح وياريت تلبسوا كمامات طبية اللي بيلبسها الدكاترة في العمليات واغسلوا أيديكم كل شوية وحاولوا تأكلوا أغذية بتقوي المناعة وتلعبوا رياضة لأن لسه مفيش مصل ولا علاج وربنا يستر علينا كلنا.