"ملحقش يعمل عزوة".. إنجي خطاب تروي تفاصيل مؤثرة عن هيثم أحمد زكي
نعت الفنانة الشابة إنجي خطاب، الفنان الراحل هيثم أحمد زكي، الذي وافته المنية عن عمر 35 عاما، إثر هبوط حاد في الدورة الدموية، ودفن إلى جوار أبيه في مدافن أحمد زكي بطريق الفيوم.
وكتبت إنجي خطاب عبر صفحتها على "فيسبوك": "أنا معرفتي بهيثم مكنتش كبيرة أوي تعرفت عليه في مسلسل "كلبش ٢" ومثلت معاه دور من أحلي أدواري دور "هنادي الغجرية"، كنت حبيبته في المسلسل.. أول ما شفته في اللوكيشن قعدت أبص عليه جامد وأقول لنفسي هو أنا هقف أمثل قدام ابن العظيم أحمد زكي شوفت فيه ملامح أحمد زكي، وطلته وهيبته قولت أكيد هيبقي شايف نفسه دا ابن أحمد زكي حقه.. وقبل ما نبدأ تصوير أول مشهد لينا لقيته جي يسلم عليا ويقولي مبروووك يا إنجي دورك مهم جدا ومبسوط اني هشتغل مع ممثله موهوبه زيك".
وأضافت: "كان في منتهي التواضع والاحترام وأسلوبه مهذب جدا في الكلام وكل مشهد كنا نصوره اروحله قبلها واقوله ممكن نراجع المشهد سوا يقولي يا ريت، وكنت بلاحظ أنه دائما واقف في حاله ومعاملته مع كل الناس في اللوكيشن من أصغر حد لأكبر حد بمنتهي الذوق والاحترام".
وختمت إنجي خطاب حديثها عن هيثم أحمد زكي قائلة: "كنت بشوف في عينه نظره حزن غريبه.. فضولي خدني أتكلم معاه قولتله انت عايش لوحدك يا هيثم قالي اه.. قولتله طيب مين بيشوف طلباتك قالي انا اتعودت خلاص.. قولتله لازم تتجوز يا هيثم ويبقالك بيت وعزوه.. قالي انا فعلا هعمل كدا وهخطب قريب تعبت من الوحده.. قولتله ربنا يسعدك يارب وفعلا خطب بعدها بشهر بس ملحقش يخش دنيا ويفرح للأسف.. موجوعه عليه اوي كأنه اخويا.. كان ليا الشرف اني مثلت قدامه إنسان في منتهي الادب والطيبة والتواضع يمكن مكناش صحاب بس الكام يوم اللي صورنا فيهم مع بعض عرفت إنسان نضيف بمعني الكلمة الله يرحمه ويحسن إليه عمرنا ما هننساك وهنفضل ندعيلك".
وتوفي الفنان هيثم أحمد زكي، في منزله بالشيخ زايد، الذي يعيش فيه وحيدًا، إثر هبوط حاد في الدورة الدموية، وهو الابن الوحيد للفنان أحمد زكي، والفنانة الراحلة هالة فؤاد.