انفراد.. ننشر نص تحقيقات النيابة في "قتيل كافيه كييف"
حصلت «البوابة» على النص الكامل لتحقيقات النيابة فى واقعة قتيل كافيه كييف بمصر الجديدة، الذى لقى مصرعه نتيجة طعنه من المدعو عمرو مصطفى الشهير بـ"عمرو فزاع"، والمتهم بقتل محمود محمد بيومى عمدًا بعد انتهاء مباراة مصر والكاميرون.
ووجهت النيابة العامة تهمة القتل العمد للمدعو "عمرو فزاع"، وتهمة الاحتجاز وتحصيل أموال دون وجهة حق لكلًا من أسامة النجار، عبدالرءوف محمود، على سياحة، وإلى صفحات من نص التحقيقات:
المتهم الأول، "عمرو مصطفى" اسمك وعنوانك؟
الاسم عمرو مصطفى أحمد حسين "عمرو فزاع"، مقيم فى 2 أ شارع محمود شاهين الشرابية
ما قولك فيما هو منسوب إليك من أنك متهم بقتل المجنى عليه محمود محمد بيومى عمدًا؟
محصلش
ما قولك فيما منسوب إليه من أنك متهم باستعراض القوة والتلويح بالعنف وذلك لترويع المجنى عليهم رواد حانوت كييف ومن بينهم المجنى عليه محمود بيومى وآخرين وكان ذلك من شأنه إلقاء الرعب فى نفس المجنى عليهم وقد تلت تلك الجريمة محل الاتهام الأول؟
محصلش
ما قولك فيما هو منسوب إليك من أنك متهم بحيازة سلاح أبيض "سلاح متعدد" دون مسوغ من الضرورة المهنية والحرفية؟
أنا باستخدمها فى الشغل بتاعى
ما الذى حدث إذن وما ظروف ضبطك وإحضارك؟
اللى حصل إنى بشتغل فى كافيه كييف من 5 سنوات تقريبًا ولكن بصورة غير منتظمة يعنى أروح وأرجع، بسبب خلافات مع المديرين علشان طبيعة الشغل وتركته فى 2016 لوجود مشكلة مع محمد الصياد لأنه كان بيخصم لى خصومات كثيرة بعد كده يوم السبت رحت عشان أشوف الدنيا وإنى أرجع وفعلا نزلت يوم مباراة نهائى مصر عشان اشتغل وفعلا رحت الساعة 5 مساءً واستلمت الشغل وملابس العمل وهى قميص أبيض وبنطلون الذى كنت ارتديه وبدأنا الشغل فعلا وكان الكافيه مزدحم وأول المباراة ما خلصت بدأت الناس تطلب الحساب وساعتها كان موكل إلى الدور الأرضى من الكافيه، وبعد انتهاء المباراة لاحظت صوت زعيق فى الدور اللى فوق أنا طلعت عشان أشوف فى إيه بدون تكليف من أى حد لاقيت "على سياحة" اللى هو كان سائق "أسامة النجار" بيزعق مع المتوفى وعرفت أن الاختلاف على الحساب بعد كده تدخل مستر "رءوف" وقام بتهديه الطرفين، وبعدها نزلت من السلم ناحية البار ومفروض أن المتوفى وأصحابه كانوا خارجين خارج الكافيه وفى اللحظة دى بعد ما أعطيت ضهرى متجه إلى الكاشير عشان أخد شيك زبائن أحاسبهم لاقيت صوت زعيق أنا طلعت أجرى نحوه وبعدها لقيت واحد معرفش هو مين بيتشابك بالأيدى مع المتوفى أنا تدخلت بين الطرفين وقمت بدفع المتوفى إلى الخارج لاقيته ضربنى فى وشى ولاقيت اتنين من ورائه بيضربونى فى وشى وقمت بدفعة إلى العربية اللى واقفه ورائه عشان أحاول اتخلص من البوكس وفعلا عرفت وهو أصبح ضهره للكافية وأنا فى مواجهة الكافيه وخلعت الحزام بتاعى وقمت بالتلويح به فى الهواء وأثناء ذلك قام المجنى عليه بالتعدى عليا بالضرب برجله فى صدرى أنا ساعتها تولد إلى الغضب ورحت مطلع الفتاحة اللى معايا وشدتها بأسنانى وساعتها فى واحد حجزنى اسمه محمد جابر، أنا عرفت أهرب منه واتجهت ناحية المجنى عليه بسرعة وقمت بالتعدى عليه بالسلاح اللى كان معايا "فتاحة الزجاجات" والضربة فعلا جت في رجله اليسرى وبعد كده الناس خدتنى دخلتنى الكافيه، وبصيت على رجليه مكنش فى دم ومتأكد أن السلاح جه فى رجله لأن السلاح كمان مكنش عليه دم، وبعد ما دخلت الكافيه طلعت الدور اللى فوق أشوف اللى حصل لاقيت الموضوع شغال دخلت الحمام اللى فالدور الثانى وغسلت وشي وغيرت القميص علشان أروح بعد كده روحت البيت فى الحدائق وبعد كده عرفت أن الولد مات أخدت والدتى طلعت بيها على بيت أخويا بمدينة السلام والمباحث أخدتنى من هناك.
ما هى الفترة الزمنية المفترض استغرقها لإنهاء عملك؟
المفروض أخلص الساعة 2 بالليل.
وهل بالفعل اعتادت ساعات العمل ثم انصرفت عقب ذلك؟
لا.
ما سبب انصرافك فى غير موعدك؟
الناس كلها قالولى أمشي عشان محدش يدور عليك ويضربك تانى.
هل قمت بتسليم المدير المسئول متعلقات عملك؟
لا محدش كان فاضى
ما الداعى لسبب انصرافك بتلك السرعة؟
مش عارف أقول حاجة
هل يقدم حانوت كييف خمور؟
لا
إذن ما سبب احتفاظك بالسلاح على الرغم بما قررته أن الحانوت لم يقدم أى خمور؟
أنا محتفظ بها من ساعة ما كنت بشتغل فى كازينو النيل
وهل قمت باستخدام الأداة آنذاك؟
أيوه أنا قمت بالتعدى بها على المجنى عليه.
هل توجد علاقة بينك وبين محمود بيومى ؟
لا
ما قولك فيما قرر بمحضر الاستدلالات بتاريخ 6/2/2017 باتهامك من والد المجنى عليه بضرب نجله وإحداث إصابته التى أدت إلى وفاته؟
أنا ضربته فعلا لكن مش دى اللى أدت إلى وفاته
هل من شخص آخر كان بحوزته سلاح أبيض وقت نشوب المشاجرة؟
على سياحة دايما معاه سلاح أبيض
وهل استخدمه وقت نشوب المشاجره؟
أنا لم أر وهو فى يده
ما قولك فيما قرره محضر جمع الاستدلالات بأنك قمت بالتعدى على المجنى عليه لمناصرة عبدالرءوف محمود؟
الكلام ده محصلش
هل توجد خلافات بينك وبين عبدالرءوف محمود؟
كان فى زمان خلافات على الشعل وزالت
ما قولك فيما قرره قرره سالف الذكر بتحقيقات النيابة أنه سمع بانك قمت بالتعدى على المجنى عليه وإحداث إصابته التى أودت بحياته؟
أنا ممكن يكون الضربة جت فبطنه لأنى جبتها من فوق إلى تحت.
المتهم الثانى، أسامة سيد أحمد عبدالرحمن النجار، ما قولك فيما قرره أحمد جلال أحد العاملين بالكافيه بأنه توجد لديك مسئولية إدرية حيال الحانوت وتعطى تعليمات إدارية؟
تعليماتى إدارية فى حدود العمل والفروع
ما قولك فيما منسوب إليك من أنك متهم باستعراض القوة والتلويح بالعنف وذلك لترويع المجنى عليهم رواد حانوت كييف ومن بينهم المجنى عليه محمود محمد بيومى ومحمد أحمد وكريم محمود ورامى مسعد الفرماوى وقد تلت تلك الجريمة جناية أخرى وهى القتل العمد محل الاتهام الأول وجنحتى احتجاز المجنى عليهم للحصول على مبلغ نقدى بالتهديد؟
محصلش
ما الذى حدث وما هى ظروف ضبطك واحضارك؟
اللى حصل انى كنت متواجد فى الكافية يوم المباراة بتفرج وبعد انتهاء المباراة قمت بالتوجه الى الحمام وانا راجع سمعت صوت زعيق سألت عبد الرؤوف ايه الحكاية وانا تحت وهو فوق قالى كان فى مشكلة على الحساب والناس مشيت وبعد كده خرجوا بره الكافية وانا رجعت مكانى ده كل معلوماتى عن الواقعة.
ما مناسبة تواجدك بالمكان والزمان سالف الذكر؟
أنا مساهم بشركة تملك كافية كييف
منذ متى والسيد عبد الرؤوف يعمل بذلك المكان ؟
هو كان يعمل منذ 2012 حتى 2015 ثم انقطع عن العمل وبعد ذلك عاد منذ شهرين تقريبا.
من الذى أعاده تحديدًا لممارسة عمله؟
انا قمت بإرجاعه
ما هو سبب إعادته؟
لأنه ذو خبرة
ما الذى دعك للذهاب لذلك الفرع تحديدًا يوم ارتكاب الواقعة؟
أصحابى كانوا جايين الكافيه ده
هل انصرفت بعد انتهاء المباراة مباشرة؟
انا كنت قاعد شوية ورحت الحمام وسمعت صوت المشاجرة
كيف نمى إلى علمك حدوث تلك المشاجرة؟
من خلال صوت الزعيق وفى حد قالى ان فى مشاجرة
وهل ابان لك عن سبب نشوب تلك المشاجرة؟
ان كان فى مشكلة على الحساب وخلصت وكان الناس نزلت على السلم وخرجت بره الكافية وانا رجعت مكانى.
هل خرج أحد العاملين من الحانوت عقب خروج المجنى عليهم؟ ومن كان برفقته؟
الوحيد اللى شوفته خارج من عندى محمود بتاع الكاميرات بس.
وما التصرف الذى حدث عقب ذلك؟
أنا لما الدنيا هديت رجعت على التربيزة بتاعتى، وانا سمعت صوت تكسير شيشة بعدين لما رجعت عند باب الكافية لاقيت الناس دخلوا تانى ولما خرجوا فى الشارع معرفش اللى حصل
هل توجد ثمة خلافات بينك وبين الرائد سمير مجدى؟ نعم فيه خلافات بينى وبينه. وما طبيعة تلك الخلافات؟ هو من 10 أيام خلى أمين الشرطة اللى معاه يكلمنى عشان ادفع مبالغ مالية لناس ليهم شيكات وأنا قولت له مش هدفع.
انت متهم بقتل المجنى عليه محمود بيومى عمدًا؟
محصلش
انت متهم باستعراض القوة والتلويح بالعنف وذلك لترويع المجنى عليهم رواد حانوت كييف ومن بينهم المجنى عليه محمود بيومى وأصدقائه وقد تلت تلك الجريمة جناية أخرى وهى القتل العمد محل الاتهام الاول وجنحتى احتجاز المجنى عليهم، لتحصيل مبالغ نقدية بالتهديد؟
محصلش
المتهم الثالث.. عبد الرؤوف محمود
ما طبيعة عملك واختصاصك الوظيفى؟
المدير المسئول عن جميع فروع الكافيهات لكييف
منذ متى وأنت تعمل بهذه الاختصاصات؟
من 2013 وتركت العمل من عام ونصف ورجعت من 15 يوم فقط.
ما هى الاختصاصات المسنده اليك بمقتضى تلك الوظيفة؟
اقوم بالاشراف على جميع الفروع
ما هى معلوماتك عن الواقعة محل التحقيق؟
اللى حصل انى كنت متواجد بكافية كييف فرع النزهة، وبعد مباراة مصر والكاميرون كنت متواجد بالطابق الأرضي للكافية وجالى أحد العاملين عمرو السيد وشهرته عمرو اسكوتر وقالى ان فى زبائن فى الدور الأول عندهم مشكلة على الحساب وعاملين مشكلة مع الويتر، وطلعت الدور الأول وتقابلت مع حوالى 12 فرد واتكلمت مع واحد فيهم وقالى ان فى مشكلة فى الحساب وأنهم 12 فرد بس فى 3 أفراد حضروا آخر المباراة وكان الحساب 1200 جنيه ونزلتله الحساب لحد 900 جنيه ودفع الحساب بالفعل وغادر وأنا فضلت فى الدور الاول أكثر من نص ساعة بعدها العاملين اخبرونى أن الناس اللى كانوا عاملين المشكلة اتخانقوا مع بتاع الشيشة علشان كسر شيشة وان عمرو فزاع عور واحد منهم والناس نقلوه المستشفى
ما مناسبة وجودك فى الكافية؟
كنت متواجد بصفتى مدير على الفروع.
من كان برفقتك آنذاك؟
واحد اسمه فؤاد وبعض العاملين بالكافية مش عارف اسمائهم.
ما هو سبب تواجد عمرو فزاع؟ وما هى وظيفته؟
هو كابتن مسئول عن عدد من الترابيزات المتواجدة بالطابق الأرضى، هو كان شغال ومشي وأنا مش موجود واحنا طلبنا الاستعانه به علشان يساعدنا ساعة الماتش بناءً على تعليمات صاحب الكافية.
أنت متهم بقتل المجنى عليه محمود بيومى عمدًا؟
أولا انا بعزى أهل المتوفى إلى رحمة الله، وده محصلش
انت متهم باستعراض القوة والتلويح بالعنف وذلك لترويع المجنى عليهم رواد حانوت كييف ومن بينهم المجنى عليه محمود بيومى وأصدقائه وقد تلت تلك الجريمة جناية أخرى وهى القتل العمد محل الاتهام الاول وجنحتى احتجاز المجنى عليهم، لتحصيل مبالغ نقدية بالتهديد؟
محصلش
هل المجنى عليه دائم التردد على الكافية؟ او يوجد خلافات بينكم؟
انا معرفهوش واول مره أشوف المجموعة دى، ولا يوجد خلافات
ما هى ظروف تقابلك مع سالف الذكر؟
تقابلت معه لما جالى عمرو السيد أحد العاملين بالكافية وقالى ان فى مشكلة فى الدور الأول مع زبائن على الحساب.
ما هو مضمون الحوار الذى دار بينك وبينهم انذاك؟
أنا سألتهم عن سبب المشكلة، أبلغونى أنهم 12 فرد و3 منهم حضروا آخر نص ساعة ومش عاوزين يدفعوا وكانت الفاتورة 1200 جنيه، وأنا نزلتها الى 900 جنيه زى ما طلبوا ودفعوا الفلوس وغادروا الكافية.
من هم أطراف الحوار تحديدا؟
انا كنت بتكلم مع واحد من المجموعة بس معرفش اسمه
وأين وقع ذلك الحوار؟ فى الدور الأول
هل تقابلت مع أحد منهم عقب ذلك؟ لا
هل عدت الى الدور الارضي الخاص بالكافية؟
أنا فضلت بالدور الاول أكتر من نص ساعة بعد مغادرة تلك المجموعة
ما الذى جذب انتباهك أثناء تلك الفترة؟
حضر اليه عدد من العمال اخبرونى ان المجموعة اللى نزلت واحد منهم كسر شيشة واتخانقوا مع عامل الشيشة وتدخل عمرو فزاع فى الخناقة وعور واحد منهم وانهم نقلوه المستشفى ومشيوا.
أين وقعت تلك المشاجرة تحديدا؟
فى الدور الأرضي للكافية وامتدت الى خارج الكافية
هل أبصرت تلك المشاجرة رؤيا؟
لا
العاملين بالكافية
اسمك وسنك؟ السيد كامل تونى، 32 سنة، عامل بالكافية.
ما قولك فيما منسوب إليك أنك متهم باستعراض القوة والتلويح بالعنف وذلك لترويع المجنى عليهم رواد حانوت كييف ومن بينهم المجنى عليه محمود بيومى وأصدقائه وذلك بقصد ترويعهم والحاق الأذى بهم وكان من ذلك شأن القاء الرعب فى نفسهم؟
محصلش
هل للمدعو أسامة النجار ثمة دور فى إدارة الحانوت؟
أيوة
هل يعطى ثمة تعليمات؟
أيوة، وعن طريق المديرين
هل كان متواجد أثناء الواقعة؟
أيوة
وكانت أقوال جميع العاملين بالكافية التى قامت النيابة بالتحقيق معهم فى الواقعة إجابتهم مماثلة لإجابة السابق ذكره.
أصدقاء المجنى عليه
اسمك وسنك؟ مصطفى محمد أشرف، 21 سنة، طالب
ما تفصيلات شهادتك؟
اللى حصل أنه فى يوم 5/2/2017 رحنا كافية كييف اللى فى شارع النزهة علشان نتفرج على المباراة، وبعد ما خلصت قام كل من روان ومريم ويوسف علشان ينزلوا، وبعد كده وقفوا وراح محمود الله يرحمه يشوف فى ايه واحنا كنا قاعدين على الترابيزة ولما رجع محمود قال المشكلة خلصت وقالوا مش هننزل غير لما ندفع، واحنا نازلين محمود قالهم دى بلطجة فكان فى واحد طويل وأسمر عرفنا ان اسمه (على سياحة) قالنا لسه شوفتوا بلطجة، واحنا نازلين سمعنا شيشة اتكسرت اتخبطت فى رجل محمود، بعد كده الكافية اتلم علينا يبلطجوا ويضربونا بالكراسي وطلعونا بره الكافية، وواحد ضرب محمود بحاجة أنا مشفتهوش وهو بيضربة، واخدت البنات ومشتهم من أمام الكافية
هل من ثمة مشاجرة نشبت بعد مشاجرة الطابق العلوى؟ وما سببها؟
أيوة، لأن محمود وهونازل رجلة جت فى الشيشة
كم استغرقت وقت المشاجرة؟
من أربعة إلى سبعة دقائق
ما الذى حال دون ذلك؟ علشان أنا كنت ماسك البنات علشان امشيهم من الباب الثانى للكافية
ما هو دور المدعو أسامة النجار مالك الكافية؟
هو كان يحرض العاملين بالكافية علشان يرهبونا ويبلطجوا علينا
وكانت أقوال أصدقاء المجنى عليه مماثلة لمصطفى محمد أشرف
خطيبة المجنى عليه
ما سبب تواجدك فى المكان؟
اللى حصل أنى كنت أنا ومحمود ومجموعة من أصدقائى بنتفرج على ماتش مصر والكاميرون.
هل كان المتوفى الى رحمة الله معتاد الذهاب الى ذلك الكافية؟
لا
هل انصرفتم بعد انتهاء المباراة؟
لا، لماذا؟ لان بعد انتهاء المباراة حاول يوسف وروان ومريم انهم يمشوا لكن معرفوش
وبأى طابق كنتم تشاهدون المباراة؟
بالطابق العلوى
وما الذى حال دون انصراف كلا من روان ومريم ويوسف؟
احنا لما لاقينهم اتأخروا فترة ومش عارفين ينزلوا فقمت انا ومحمود نشوف فى ايه
وما الذى استبان لكم حال ذلك؟
عرفنا انهم مانعينهم من النزول عشان خاطر يدفعوا الاول ومحمود الله يرحمه دفع 900 جنيه ونزلنا
هل أبصرت واقعة التعدى؟
لا
ما الذى حال دون ذلك؟
لانه اغمى عليا لما اعدت اعيط
هل لديكى ثمة معلومات حول واقعة التعدى؟
لا أنا مشوفتش حاجة
هل تتهمى كل من أسامة النجار وعبد الرؤوف محمود وعمرو فزاع؟
اتهم عمرو فزاع بالقتل وأسامة وعبد الرؤوف بالاحتجاز
أقوال الشهود
اسمك وسنك ووظيفتك؟
ناصر سيد عبد الله، 40 سنة، حارس عقار رقم 53 شارع النزهة.
ما تفصيلات شهادتك؟
اللى حصل انى حارس عقار رقم 53 المجاور للعقار 55 بشارع النزهة والذى به كافية كييف وبعد مباراة مصر والكاميرون كنت على الجهة المقابلة للكافية وشوفت ظيته ولما عديت الشارع شوفت عمرو فزاع وعلى سياحة زقوا واحد على العربية واضرب فى صدره وفى رجله ووقع على الارض وخطيبته اغمى عليها وبعد كده دخلت بيتى ومعرفش ايه اللى حصل.
اسمك وسنك ووظيفتك؟
كريم رضا، 30 سنة، ضابط بالقوات المسلحة
ما تفصيلات شهادتك؟
اللى حصل انى كنت قاعد بتفرج فى كافية كييف على مباراة مصر والكاميرون وبعد انتهاء المباراة لاقيت بنتين واقفين مع الويتر وحصلت بينهم مشادة كلامية على الحساب، وبعد كدع بنت منهم اتكلمت فى التليفون وبعد دقائق حضر المتوفى محمود محمد بيومى وبدء تحصل مشادة بينه وبين الويتر، ومستر (عبد الرؤوف) كان بيحاول يحجز بين المتوفى والويتر عندما حصل تشابك بالايدى.
ونزلوا وتشابكوا على سلم الكافية واستمر الزعيق وبعد حوالى دقيقتين خرجت وأنا ماشي لاقيت الناس اتلموا بره بيحوشو بين ويتر ماسك حزام وبعد كده مشيت.
من كان يتواجد برفقة الفتاتين آنذاك؟
هو كان معهم شاب يدعى كريم هو من طرف المتوفى
هل كان المجنى عليه محمود محمد بيومى متواجد أثناء ذلك الحوار؟
لا
وكيف حضر إذن الى مكان الواقعة؟
هى البنات اتكلمت فى التليفون وبعد حوالى دقايق هو حضر
ما هى الحالة التى أبصرت عليها المتوفى محمود بيومى؟
هو أول ما حضر كان بيزعق مع الويتر اللى كان واقف مع البنتين
ما هو دور المدعو عبد الرؤوف آنذاك؟
هو كان بيحاول يحجز الويتر العامل بالكافية
وأين وقعت المشاجرة تحديدا؟
فى الدور الأول وبعد كده نزلوا على تحت
من هم أطراف المشاجرة؟
ويتر يعمل بالمكان والمتوفى محمود بيومى
ومتى قمت بمغادرة المكان؟
بعد حوالى 3 دقائق
وهل تقابلت مع أحد أطراف المشاجرة آنذاك؟
أنا لم أرى أى أحد حتى البنتين لم أرهم
اسمك وسنك ووظيفتك؟ بسنت أحمد، 25 سنة، صيدلانية.
ما تفصيلات شهادتك؟
اللى حصل أنى كنت قاعدة فى كافية كييف وفوجئت بخناقة بين المتوفى والعاملين فى الكافية وضربوا بعض بالكراسي، وخرجوا بره الكافية وبعدها بحوالى نص ساعة خرجت لم أرى أى من محمود أو أصحابه افتكرت الموضوع خلص.
ما الذى جذب انتباهك بالكافية؟
فجأة لاقيت محمود بيومى وأصحابة بيزعقوا مع الويتر اللى شاغلين فى المكان
من هم أطراف المشاجرة؟
محمود بيومى وأصحابه مع اللى شغالين فى المكان.
وما دور كلا منهم؟
كانوا بيحدفوا بعض الكراسي
هل نتج عن تلك الواقعة إصابات؟
كان فى واحد من اللى شغالين على دراعة دم بس معرفش ايه السبب
ولما انتهت تلك المشكلة؟
هما فضلوا يضربوا بعض بالكراسي وطلعوه بره الكافية ومعرفش اللى حصل بره.
أين وقعت تلك المشاجرة؟
هى حصلت فى الدور الأرضى بالمساحة الخارجية.
وما هى الحالة اللى كان عليها المتوفى محمود بيومى؟
كان بيضرب ويضرب وخرج من الكافية على الحالة دى.
ما هى الحالة التى أودت بحياة سالف الذكر؟
أنا مشوفتش ومعرفش سبب وفاته.