تواصل وزارة التضامن الاجتماعي، إلقاء الضوء على أبطالها والنماذج المشرفة في المجتمع، تحت عنوان "سفير التضامن"، وذلك على مدار أيام شهر رمضان، وبطلة اليوم ندى طلعت التي استطاعت عبر معرض ديارنا تسويق مننجاتها.
وتقول ندى: النجاح.. حلمك بالنجاح ممكن تخطط له حتى من وأنت طفل وتستنى الفرصة كل يوم علشان تحققه.. أنا ندى طلعت بنت محافظة دمياط وبطلة حلقة انهاردة من سفير التضامن.وتضيف: البداية وأنا عندي 8 سنين.. كان عندي حلم إني أقدم حاجة مختلفة.. كبرت ودخلت كلية فنون جميلة.. وشوفت ثقافات مختلفة.. وكنت حابة أوظف الثقافات دي في تصميماتي.. حياتي العملية الحقيقية بدأت لما اشتغلت في إحدى مصانع الموبيليا.. اتعلمت في الوقت ده يعني ايه تصميم آثاث وإزاي أوظف التراث مع عدة ثقافات في تصميم الآثاث.
وتتابع: بعدين جالي فرصة إني أقدم في مسابقة لشباب المصممين وسافرت ألمانيا.. المسابقة كانت نقطة تحول في حياتي.. فزت بالمسابقة واتعلمت منها خبرات مختلفة.. وكانت بداية المشروع بتاعي.. كان الأهم بالنسبالي إن مشروعي يكون متعلق بالتراث اللي اشتغلت عليه.. زي التراث الإسلامي والنوبي.. تصميماتي في الأول كانت على الخشب بس.. دلوقتي دخّلت الصدف كمان .. وكنت بنزل المحافظات علشان اسوق تصميماتي.
وتضيف: وزارة التضامن الاجتماعي كان ليها دور واضح معايا في التنظيم والدعاية ليا ولمنتجاتي خلال اشتراكي في معارض ديارنا عن طريق الإعلام ومواقع التواصل الاجتماعي.. وده ساعدني احقق مبيعات كويسة.. كمان معرض ديارنا ساعدني أقدم الجديد في منتجاتي وفتحلي سوق مختلف.. أنا بحلم ييجي اليوم ومنتجاتي توصل للعالمية.
