دخلت نجلاء سامي أرملة الشهيد عامر عبد المقصود نائب مامور قسم " كرداسة" في نوبة من البكاء في أول تعليق على مشهد استشهاده في مسلسل الاختيار 2 قائلة: "اليوم كان صعب عليا ومن وقتها مابطلتش بكاء لإن المشاهد رجعتني لنقطة الصفر من بداية الأحداث التي مر عليها ثمانية سنوات وهي مشاهد مؤلمة أوي".
وتابعت في مداخلة هاتفية خلال برنامج " كلمة أخيرة " الذي تقدمه الإعلامية لميس الحديدي على شاشة "إكسترا نيوز" خلال شهر رمضان قائلة: "بس المشاهد كانت مهمة عشان الناس تفهم ايه اللي حصل لضباط قسم كرداسة وافرادها ومجنديها ويعرفوا يعني إيه أبطال شرطة وانهم فقط كانوا بيدافعوا عن مكانهم ويعرفوا بطولة عامر عبد المقصود ومأمور القسم رحمة الله عليهم وكل أبطال كرداسة".
وواصلت: " كل اللي عملوه أنهم كانوا بيدافعوا عن مكانهم عشان لا يرفع علم القاعدة وعامر كان مشهود له بالأخلاق السمحة وكل الناس عارفة وأنا كنت منتظراه يرجع وقتها بعد خدمة عشرة سنوات في الفيوم لكن مالحقش لانه استشهد في مذبحة الخسة والخيانة في كرداسة".
وأكملت: " من 8 سنوات ومش بنساه والأحداث في مسلسل الاختيار 2 رجعتني لنقطة الصفر لكن معلش مهمة برضه أن المصريين يفهموا أن شهداء الشرطة ضحوا كتير اوي عشان مايترفعش علم القاعدة مكان علم مصر وإزاي تصدوا للإرهاب الغاشم وجوزي مارضيش يسيب مكانه كان بني أدم خلوق ومحب للخير لكن إرادة ربنا مش هقول غير حسبي الله ونعم الوكيل".
واصلت: "عندي ولدين 27 سنة و21 سنة وكانوا موجودين معايا ومش عارفة احكي حالتنا كانت عاملة إزاي ؟ صحيح اولادي شباب بس الموضوع المنا كثيرًا أثناء مشاهده المسلسل ".
ووجهت التحية لأبطال الجزء الثاني من مسلسل الاختيار قائلة: " إختيار موفق في الجزء الثاني حتى يلقي الضوء على بطولات الشرطة المصرية كما سلط الجزء الاول الضوء على بطولات رجال الجيش المصري وانا بشكر المنتج والمرلف والمخرج بيتر ميمي وهقلهم اللي إنتوا عرضتوه مايجيش صفر على الشمال من اللي حصل على الحقيقة لكن مهم عشان المصريين يعرفوا أن ابطال الشرطوا بيضحوا بالغالي والنفيس مش خسارة في مصر".
وعن مشهد تناوله مياه النار في أحداث المسلسل قالت: " ايوه ده كان جوزي الشهيد عامر عبد المقصود كان صايم الستة أيام البيض وده كان اليوم الثاني في الستة أيام وقعدوا يعذبوه أربعة ساعات وسحلوه وقطعوا شراينه وضربوه بمواسير مياه على رأسه ورصاصة في قدمه حتى يعجز عن المشي ورغم كل ذلك رفض مغادرة المكان وناشدته بمغادرة القسم وقالي: مش عامر عبد المقصود اللي يسيب علم القاعدة يترفع على القسم مكان علم مصر".
واصلت في سرد ذكرياتها: "سحلوه من كرداسة لحد ما سلموه للمجرمة الحقيرة اللي ظهرت في الأحداث سامية الإرهابية اللي مكنتش تعرفه اصلًا لكن لمجرد الانتقام من وزارة الداخلية وهوا بيحتضر كان عاوز يشرب ميه كانت بتشربه مياة نار".
