مدخل
ماكنش ينفع
الدخول للأفكار الخطرة
بدون استعداد سابق للدفاع عن النفس.
(1)
دخول
ماكنش ممكن
التفكير ف المشاعر السرية بدون رقيب على ضميرى
و هنا بالقى الضمير
بيتخلى عن فكرة انه الرقيب
او المعادل الموضوعى للاله
ويسيب الرقابة تشد الحزام على روحى لدرجة الخنق
أقطع الكتابة
و أغض البصر عن المرارة اللى بتحصلى ساعتها
و اجمع خريطة ممكنة لكتابة نص عادل
ما فيهوش
خدش لحياء التفكير
و لا الدخول لأماكن محرمة ف النفس .
(2)
كشف
باطرح افكارى للمناورة
و اثبت أقدامى على نقاط الاختلاف بهدوء
و لما تحين لحظة الصيد
يحصل الكشف
يخرج الحجاج بن يوسف ف بيان تيليفزيونى :
يبرأ معاوية _
يدخل السكينة ف قلب الزبير_
بتجديد الكسوة ومد السقاية
يخمد فتنة النجف_
باقامة الحد و ارساء مبدأ الحاكمية
و يستكمل الحجاج البيان :
ان
من عدل الخليفة
تم
الغاء تفتيش الحجاج_
_ منع حظر التجوال ف الكعبة
_ اتاحة الحريات جميعا
و انهى البيان
باعلان :
!نجاح اغانى الفيديو كليب
(3)
تداعيات الفرجة .. فتح
نفسى مش امارة بالسوء
و لا عقلى حكيم
سايبة لك الباب موارب
لحالة الانتظار اللى بتحطنى فيها باستمرار
و اعتقادك ان ده ضمان اكيد لاستمرار العلاقة
بامد لك الحبل ع الغارب وولى ضهرى لانتظار خنجرك الحجازى
يبقع قميصى بدم عثمان
و صوابع نائلة الحايرة بالشهادة
تداعب شعرى بحنية
هنا نفسى أمارة بالسوء
و خروجى
ح يكون من غير طواف
أو سعى لانجاز
صورة مستعارة.
