بعث الفنان وليد فواز برسالة عتاب خاصة للفنان محمد رمضان بعد تداول صور للأخير وسط نجوم إسرائيليين، ونشر فواز على صفحته الرسمية بإنستجرام صورة لرمضان وهو في بداية نجوميته كتب عليها: محمد رمضان الطموح الموهوب اللي قابلته في بداية الطريق، محمد اللي لما عمل إحكي يا شهرزاد قابلني في موقف الإسعاف وقالي فواز انا نازل أشوف صورتي على الأفيش (إحنا هنبقي نجوم جامدين يا له) بس أنت الأجمد دلوقتي".
وتابع: "واحشني محمد اللي كان بييجي يتفرج عليا في مسرح الشباب ويبدد بحماسه وطاقته التي لا تنضب بالأمل أي شعور بالإحباط عند أي حد بيشوفه،
محمد اللي واحشني هو محمد اللي في الصورة دي، أنا حابب أحط الصورة دي أكتر من أي صورة تانية ليك دلوقتي، لو الناس كلها قالت إنك اتغيرت ميخصنيش
لإني عارف إنت مين وقد إيه كنت جدع معايا، محمد اللي انت وصلتله ولسة هتوصله كمان فعلا تستاهله لأنك مميز وقبولك رباني".
واستكمل: "بس إسمحلي يا صاحبي العنيد وإللي أعرف عنه من زمان إن دماغه أنشف من الحجر، ولا يسمع إلا عقله فقط، اطلب منك أن تعيد النظر في إللي بيحصل عشان خاطر جمهورك الحقيقي "الناس البسيطة" والتي نصبتك ملكا متوجا على قلوبهم، الناس اللي شافت فيك الأمل ،بص من منظارهم للحكاية، بعيدا عن أي "مزايدات" "فيه خطأ حصل وإللي حصل حصل وخلاص وانت كبير وناضج واب ورب اسرة وعارف ايه الصح وايه الغلط، لكن يا صاحبي الاعتذار من شيم الرجال ولا يقلل منك أبدا".
وانهى حديثه: "فكر يا محمد عشان خاطر جمهورك الكبير وموهبتك ،محبش اشوف واحد بحبه بجد يدفع تمن فاتورة كبيرة قوي هي أصلا مش بتاعته".
