وجهت غادة عبد الرحيم علي، أستاذ علم النفس بجامعة القاهرة، نصيحة لطلاب الثانوية العامة، وخاصة الذين لم يحصلوا على مجموع كبير، قائلة: «اوعى تحبط وتفتكر إن ده آخر المشوار، في ناس كتير أوي جابت مجموع مش كبير في الثانوية العامة وعرفوا يحققوا أنفسهم في مجالات كتير واشتغلوا على نفسهم، ولا زويل كان من أوائل الثانوية العامة، ولا مجدي يعقوب، ولا فاروق الباز، ولا نجيب محفوظ، ولا أم كلثوم، ولا محمد صلاح، ولا أحمد حلمي، ولا غادة عبد الرحيم».
وأضافت عبر صفحتها الشخصية على «فيس بوك»: «صدقوني مفيش حاجة اسمها كلية قمة ولا كلية قاع، المكان بيكون قمة بيك أنت، بمجهودك، بحبك للي بتعمله، وتعالوا نفتكر كده مع بعض كام واحد من أوائل الثانوية العامة من السنين اللي فاتت سمعنا عنهم تاني، وده مش تقليل منهم ولا نفسنة، أنا أعرف شاب اسمه كيرلس موسي عجايبي من المنيا، وجاب مجموع مش كبير في الثانوية العامة ودخل جامعة خاصة بس علشان هو مجتهد وكمان عنده حلم وطموح وعبقري قدر يتواصل مع دكتور في جامعة هارفرد وسافر هناك واتعلم ودرس وأثبت إن مفيش مستحيل».
وتابعت: «صدقوني اجتهدوا واسعوا لتحقيق حلمكم مهما كان بعيدا طالما مؤمنين بيه هتحققوه».
واختتمت: «وأخيرا نصيحة للأهالي الذين لم يحصل أبناؤهم على مجموع كبير.. متزعلوش أولادكم ولا تجرحوهم ولا تقارنوا بينهم وبين أصحابهم وجيرانهم، ولا تزعلوا عليهم، خليكم في ظهرهم، شجعوهم أكيد، هما عندهم حاجة تميزهم، والثانوية العامة مش نهاية المطاف.. ومبروووووووك لكل الأوائل وكل الناجحين، لسه المستقبل والمشوار طويل اجتهدوا، الثانوية العامة ليست نهاية المطاف وأتمنى أن أرى علماء جددا من هذا الجيل على درب زويل ومجدي يعقوب وغيرهم من العلماء».
