كشفت صباح خضير مفجرة فضائح أحمد بسام زكي عن الخطوات القادمة لها ولنشاط القضية.
وقالت صباح في تصريحات خاصة لـ"البوابة نيوز"، "دلوقتي في بنات كتير بتطلع تتكلم عن قصصها بعد ما تم التحرش بيهم وكل حد شاف أن في حق بيتجاب عايز حقه وطبعا أنا سايبة ده كله للبوليس والحكومة تتعامل لأن لحد دلوقتي مشوفتش حاجة منهم وحشة ناحية البنات/ وقد ايه هما مساندين ليهم وبيخفوا معلوماتهم وأساميهم"
وأضافت: أنهم كمان ليهم حرية الاختيار يشوفوا أحمد ويواجهوه بأفعاله ويتعرفوا عليه أو لا انا حد سافر كتير كمان وبشوف البنات بتتعامل ازاي بره وبشوف هما ازاي بيبصوا على مصر اننا معروف اننا اكتر ناس ليها تاريخ في السينما والفن والغنا والثقافة وعندنا تاريخ غني وثري ومعروف ان أي حد بيبص على مصر بيبص على مصر بتاعت زمان.
وتابعت صباح: "إحنا ممكن نرجع زمان وتبقي احسن من زمان كمان بس نبدأ نتعامل مع البني ادمين انهم بني ادمين لما نبدأ نتكلم مع أولادنا وبناتنا انهم يبقوا فاهمين حقوقهم ويكون في قوانين رادعة وقوية ضد أي متحرش ومغتصب تحكمهم وللناس اللي بتقول انه مريض بغرائزه احب اقولهم أحمد بسام زكي ذكي جدا وعارف هو بيعمل ايه لانه بيعمل ده في الخفا مش في العلن لانه عارف انه غلط ومكنش في برشلونة هيمسك نفسه وميعملش أي تحرش ملموس لانه عارف عقوبة ده في أوروبا ايه".
وأشارت إلى أن أحمد بسام زكي نتاج للبيئة بتاعته أنا مش بكرهه هو طلع لقي نفسه كده هو نتيجة مجتمعه انا مش عايزاه يتأذي جسديا أو يتعدم أو يتقتل ان كل اللي عايزاه انه ميكنش عنده أي فرصة يأذي أي حد تاني وخلاص وعشان كده لازم يتسجن.
وقالت صباح: "أنا ببص على الحلول اكتر عشان ده ميحصلش تاني مش فكرة انه يتأذي أو يتهان مش هنحل حاجة بالعنف البنات للأسف كلها أتأذت وأثر في نفسيتهم وغير حاجات كتيرة فيهم ومطلوب منهم انهم يكملوا حياتهم".
