علقت السفيرة نبيلة مكرم عبد الشهيد، وزيرة الدولة للهجرة وشئون المصريين بالخارج، على صورتها المتداولة بمرورها على معدية تم وضع سجادة عليها خلال زيارتها التفقدية بمحافظة الغربية.
وقالت وزيرة الهجرة على حسابها الرسمي على موقع التواصل الاجتماعي "فيسبوك": "ايوة انا وزيرة الهجرة إللي زرت النهاردة 4 قرى في محافظة الغربية (الفرستق وكتامة ومحلة اللبن واخيرا قرية شبرابلولة) وكنت سعيدة أنى قدرت أروح أكلم مع الناس الجدعة إللى شغالة وهم كمان كانوا سعداء انهم شافوا مسئول جيه لغاية عندهم.. ما تعبناش وقلنا كفاية قرية واحدة لا كنا فرحانين وعايزين نعرف محتاجين إيه علشان نساعدهم".
وتابعت: "ولما خلصنا الزيارات قعدنا كلنا أنا والمحافظ والناس الجدعة إللى نزلت معايا من البنك المركزي وبرنامج التعليم الفنى وجهاز المشروعات الصغيرة والمتوسطة والمجلس القومى للمرأة علشان نحط خطة الدعم إللى ممكن نقدمها لولاد القرى دول.. الناس إللى بتتعب كل يوم واللى مش فاضية تعد تفتي وتتنظر.. رجالة بمعنى الكلمة وعلشان كده إحنا روحنالهم نساعد وندعم".
واستكملت: "الناس دى مش منافقة الناس دى كريمة ولاد بلد مرحبة بالوزيرة إللى نزلت مع ناس غيرها تسأل عنهم بتوجيهات من رئيس دولة عايز ينمى قراهم".
