نشرت الفنانة ياسمين غيث عبر حسابها الشخصي بموقع "انستجرام" صورة لها وهي داخل المستشفى.
وكتبت غيث على الصورة بقولها: "أنا كويسة الحمد لله.. بس الحقيقة أنا النهاردة الصبح كنت حرفيًا بموت، صحيت على خبر وفاة هيثم أحمد زكي.. اللي أثر فيا ووجع قلبي".
وتابعت: "صحيت على وجع في صدري رهيب، وجع ناحية قلبي وفضل يزيد جامد قوي وضربات قلبي تعلي وتنزل في لحظة وقلت خلاص دي غالبًا يا جلطة يا heart attack في الطريق، كنت لوحدي في البيت، وركزوا معايا في "لوحدي" دي، لحسن حظي كانت صحبتي جاية تاخدني وننزل، طلعت لي لقتني بموت حرفيًا وبقول لها "خديني المستشفى حالًا أنا بيجيلي heart attack".
وواصلت: "روحنا على المستشفى ودخلنا الطوارئ وبدءوا الدكاترة يعملولي رسم قلب على ضغط وسكر وكل الكلام ده، النتيجة "كله طبيعي" وأنا بصرخ من الوجع وذراعي بينمل وبعيط وبفتكر كل اللي حصلي في حياتي وبقول لهم "والنبي أنا خايفة، أنا مش عايزة أموت دلوقتي مش عايزة اسيب ابني".. يطلع عندي "panic attack" يعني "نوبة خوف".
وأضافت: "إدوني مهدئات لغاية ما نمت والدكتور قال لي أنت متوترة من حاجة وده اللي عمل فيكي كده، لازم تهدي وتريحي "وطبعًا لأني من وقت تعبي بقيت بترعب وبخاف أكتر من زمان بكتير فالخوف كان الضعف".
وتابعت: "الحمد لله جت بسيطة وربنا ستر عليا.. بس بجد الإحساس كان مميتا، بدأت أتخيل الغلبان ده "هيثم" اللي ممكن يكون حصل له حاجة شبه كده بس كان لوحده ملقاش اللي ينقذه ويوديه المستشفى وبدأت أفكر إن تاني ربنا بيحاول يوعظنا كلنا بحد محبوب من كل الناس، الوحدة وحشة قوي يا جماعة، كفاية نحكم على بعض من بعيد لبعيد، كفاية بعد وجفاء، كفاية كلام على بعض، كفاية تشكيك في بعض، كفاية تناكة وقرف، كفاية كفاية، الدنيا بتخلص في لحظة ويا رب متخلصش بينا واحنا لوحدنا، ربنا يرحمك يا هيثم ويرحمنا جميعًا!".
