متسألنيش يا روحى عن ماضى منيش فاكراه
ولا حاضر بكل ما فيه منيش شيفاه
أنا عايشه في أحلامى
عالم ساحر اكسر فيه حواجز يا ما أدامى
أنا في حلمى بكون طايره
بشيل في قيودى وأنا سايره
هناك بضحك بصوت عالى
مفيش ولا عين بصالى
واجرى ونفسى مش مقطوع
ولا قدمى يكون موجوع
واطير وافرح وشعرى يطير
واغنى واروح مع العصافير
وعايشه في كون أنا ملكاه
وبعمل كل اللى بتمناه
أهدى يا روح من الألم ومن العناد
مشوار طويل مشيتى فيه مليان بعاد
ليه تهتى منى ولحد أمتى هفضل أحايل فيكى
قوليلى طيب ازاى أنا أراضيكى
غابت كمان ليه ضحكتى
لسه يا روح بتنعى وبتشتكى
اهدى يا روح بلاش تزيدى في عناكى
طايره وعايمه ومش راسيه ليه على بر معاكى
ليه غايبه دايما مش لاقيه غير أوقات قساكى
ليه يا روح عنيده
وليه بعيده
وليه عاملة زاى الريح
ليه بتشبطى في كل فرحة وتختفى وتسيبى قلبى جريح
تعالى يلا وقربى
ليه بتهربى
دانا خايفة وأنا وياكى
من كتر غيبتك قربت والله أنساكى
لستنى شايفة الدنيا بحر كبير
تخطفنى فيه الدوامة واطلع واجرى واطير
والعمر عدا ولسه باقى ياااما فيه مشواير