ناشد أهالى شارع الترعة بمنطقة أرض اللواء، مسئولى محافظة الجيزة التدخل السريع لإنقاذهم من انتشار القمامة فى الشوارع العامة، وبوجه الخصوص شارع الترعة، والتى تتسبب فى مشاكل وخيمة.
يقول «عم منير» البالغ ٧٠ عاما، أحد سكان المنطقة: «الريحة صعبة فى المكان هنا ده غير الحشرات المتكونة بسببها، ومبهدلانا والمنظر ده غير آدمى بالمرة».
وأضافت «أم ميسون»، ٢٨ عاما، «أنا مريضة صدر وعندى حساسية شديدة، والقمامة سبب رئيسى فى انتشار الناموس والذباب فى المكان، ولما بستخدم مبيدات حشرية بتعب صحيا جدا، وفى نفس الوقت مش قادرة أقاوم الحشرات دى، طب أعمل إيه».
ويضيف: «أبورجب»، ٦٠ عاما «بصراحة دى مش عيشة ترضى حد، ولما أنزل أجيب طلبات بيتى، ألاقينى ماشى فى وسط القمامة، ده يرضى مين، لازم يكون فى حلول بدل العذاب إلى احنا عايشين فيه ده حرام، أى إنسان نفسه يعيش حياة كريمة ومستقرة كفاية ضغوط الحياة علينا فى كل حاجة، فمش حاجة زى دى ما نلاقيش حل رغم أن الحى ممكن يحلها فى ثوان، زى توفير صناديق القمامة فى كل مكان وتتاخد وتتفرغ فى المكان المناسب، إنما المشكلة لو فى صندوق بنلاقيه مليان وحواليه القمامة وما حدش بياخدها».
ويستكمل: «عم حسونة»، ٥٥ عاما، «مجرد فتح أى منفذ للبيت أصطدم بريحة القمامة، ومجرد ما أشوفها قدامى نفسى بتتسد، ده غير الحشرات إللى بتدخلى وتبهدلنا، بجد أنا بعانى معاناة كبيرة من القمامة دى، يا ريت الحى يكتر صناديق فى كل مكان، وحد من عمال النظافة يأخذها كل يومين، بدل ما بنمشى وندوس عليها كدة».
واختتم سكان شارع الترعة بأرض اللواء، بمناشدة المسئولين، مطالبين بحل لما يعانونه من انتشار القمامة.
